PRISKO GINTING

Persentabi Wisata Berastagi

Written by Bapa Egi Sitepu baru denga nginap kami i Berastagi janah sempatken kami dalan dalan kempak Lau Gumba. Ate kami ngenen Monumen/Patung Bung Karno ibas ingan pengasingan na ndube asum ia i tawan Belanda. Labo ndauh dalan protokol nari kira kira 500 meter ngenca, tapi andiko dalan ku je seh kal serana perban aspalna enggo sontar janah kawes kemuhun peren merambah. Ingan enda merupakan spot/titik wisata sejarah, tapi sitik pe la jadi perhatian PU ras Dinas Pariwisata Seni Budaya. Sebagai pengagum Bung Karno kuakap enda tergolong pelecehan. La si ergai Bapa Rayat sirulo. Emaka piah tundalken patung Bung Karno deleng Sibayak ras Deleng Sinabun, tatapna kuta Peceren, ngenen kalak nukur wajid ras pecal joren.

Lepar uruk Bukit Kubu lit kompleks Villa Berastagi High Land, wilayah Lau Gumba denga. Kerina rumah Villa i segel Dinas Pariwisata Seni dan Budaya ibas gelar Pemkab Karo. “Bangunan ini belum mendapat izin, dan di segel sementara” alu teks megara “PERINGATAN”, “Dilarang membuka segel, akan diproses secara hukum”. Si mada rumah tentu sengget janah kecewa, la tehna kai salahna. Lalit pernah alokenna surat panggilan tah peringatan, rempet rempet saja i segel. Lanai nge lit cara sideban si lebih berbudaya tahpe berseni? Mungkin maksudna ndarami retribusi tahpe Pendapatan Daerah, tapi carana kurang simpati, erban kalak ernembeh ate.

Situhuna mbue denga kal potensi wisata si banci ikembangken sekitar Berastagi ras sekelewet Taneh Karo simalem. Tapi menam la lit kreatifitas ras inovasi Pemkab Karo pemurmurken kinijilen Taneh Karo. Kuga maka la promosiken Deleng Sinabung ras Deleng Sibayak.(adi kam nabung banci kam bayak). Gunung Berapi labo mbue babo pertibi enda tapi lit dua deher kutanta. “Only a few volcanos all over the world with an exeption in Java island, but thera are two in North Sumatra, both are in the Karo high land”

Lit kap legenda “Kertah Ernala” nini Deleng Sibayak, “Beru Tandang Kumerlang” ras “Beru Tandang Suasa.” Bicara turiken enda man anak sekolah tah mahasiswa tentu tambah rincuhna nangkih Deleng Sibayak. Adi enggo kita seh das ancuk ancuk deleng, banci natap ku daksina ras kempak utara, bagepe kempak Purba ras ku Bustima. Teridah mbalmbal meratah, idah ka sampuren seh ulina

Enggo puluhen tande tahunna, pertanin taneh Karo labo reh majuna. Adi tek kam pedah kakatua, pariwisata nge cot na dogolta. Baju dinas ola pejegir bana cirem mehamat kam man temuenta. Reh buena kade kadenta, lanai rate tedeh mulih ku kuta. Ola pada pindo karcisna adi atena ku Jaranguda, tahpe Gongsol Kampung Merdeka. Lane pagi kalak ku uruk gundaling, mbuesa tei kuda kerah la daring.

(I turiken Bapa Egi Sitepu, Jakarta)